幾年前韓國出品Market O Real Brownie hit過一排, 雖然熱潮過左, 但咁多年都仲有得賣未消失算捱得. 其實佢做唔到Brownie嘅煙韌同濕潤感, 一口咬落去無阻力到底粉粉地, 但不至於餅乾咁乾, 放入冰箱雪完硬左係有返啲咬口, 但食落其實同朱古力差唔多. 一舊好細得兩三啖已經120kcal, 咁不如直接食3格朱古力仲滿足, 反正都係一樣肥. 幾年前買嗰盒包裝有教放微波爐或焗爐熱一熱佢, 嗰時我有試的確係熱左口感似啲Brownie, 但係咁細件野仲要搵個碟載住先可以翻熱 (包裝袋唔入得爐), 要我服侍佢一輪先似返啲Brownie, 而家年紀大無咁天真搞呢啲😑佢似Brownie嘅地方主要係味道, 好濃蛋糕類嘅朱古力味, 將呢種味道放喺未到餅乾咁乾嘅質地, 再改個Brownie名的確係可以幫助聯想, 但僅限聯想. 一盒四舊好細件賣$18.9唔係平, 既然做唔到Brownie質地已經無乜存在價值, 如果想要呢種味不如直接買朱古力蛋糕, 畀多幾蚊大大件. #MarketO #Brownie

個樣堅似Brownie, 可惜質地唔得.

$18.9其實一部份去左包裝, 個盒手感圖案都幾精緻.

1件24g有119kcal, 3格吉百利提子果仁牛奶朱古力25g有129kcal, 相差唔多我寧願食3格朱古力, 襟食啲, 口感又比佢好.

雖然半年食用限期偏少, 買嗰時又已經過左兩個月, 但份量咁少一下就食哂.

宣稱有52%真正朱古力, 同實情吻合, 朱味的確係濃, 不過不如直接食朱古力.