今日又係出糧日 終於係整整一個月o既糧
象徵式俾左一千蚊阿媽
阿媽好好人 佢問返我有無錢洗先
如果唔夠洗就叫我留返自己用
突然覺得自己搵咁少錢有D過意唔去

自從做左野意識到自己係一個窮人
身家已經見底
諗返轉頭 都唔多記得o個十萬洗左去邊
我諗不外乎都係飲下食下 買下野 去一兩次旅行
唔見得做過D乜大事 但係錢就已經唔見左
但係我無後悔 反正錢本來就係要黎洗
我雖然唔太記得D錢用左係邊
但同時我亦記唔起有邊次洗左係唔應該洗o既地方
除左o個一次 但當買個教訓
而且又唔係真係去到咁差 
不過我一定唔會再俾自己有下次
所以可以算係洗得無怨無悔
再且而家又未到要憂柴憂米
錢財身外物 何必太在意

曾經有D人問我點解咁多錢洗
我成日都會笑笑口話俾人包起左
唔知有無人真係信
但如果有人信左真係要驗驗眼同IQ
因為邊有人咁肯蝕底拎錢黎包我D咁o既質素o既人
如果真係有 唔該快D介紹黎
不過係我個人立場黎講
呢十萬應該都算係唔見得光o既地方黎
但每一件事終會有佢o既代價
只係差在你願唔願意負責
同幾時及咩方式去償還
但係呢十萬我本來就唔係為左吃喝玩樂而籌備
佢係助我改變自己整個人生o既踏腳石
最後胎死腹中 錢還在手 
倒不如吃喝玩樂去罷
不願再想太多

不過積蓄防飢好重要
所以由而家開始我要將每一蚊 每一分資源
都要用得其所 儲返D錢返黎
不過我係一個唔主張慳錢o既人
因為我相信錢唔係慳返黎 
而係因為懂得運用錢而生財
如果一件物件經過計算所有tangible cost及intangible benefit後
真係值$1000
我絕對唔會為左要銀行戶口個銀碼保持不變
而唔買呢樣野
如果錢能夠買到快樂 我覺得已經係物超所值
因為對我黎講 我o既快樂實在太罕有
而且我覺得一個人如果去到無錢旁身o既地方
好手緊
真正原因唔係單單因為佢買野太多
而係因為佢無將一蚊當成一蚊咁洗
即係佢總係用一蚊買左只係值五毫o既野
呢種洗錢心態先係真正致窮o既原因
所以我o既target係 
一係就保持生活質素依舊但係用o既錢少左
如果唔係就用o既錢係一樣咁多但係生活質素上升
我唔係單單追求要慳多D錢
我覺得有好多野 用下腦花少少心思 安排下
Make and Match
同樣可以用好少錢就做到好多野
呢個世界其實存在著好多種玩法
但同時又會萬物歸一
兩者並列但絕不矛盾