出發前一個星期六原本約左朋友食飯砌puzzle, 一早預訂左同事順路嘅話車我過去, 同事OK, 但未放工就收到朋友通知病左要取消, 又知道同事嗰晚要過澳門, 喺被甩底嘅悲憤下提出拉大隊過澳門, 但因為太突然無人應機, 最終講講下變左約下星期六, 結果成功yo左15人.

15人唔係全程一齊活動, 有啲一落船快食個茶餐廳就開賭, 有啲就去嘆個翅先, 我地就4人一組由朝食到晚. 首站係由碼頭飛的去金利食店, 原來澳門地方細細飛的都唔平, 由氹仔到澳門半島要差唔多成舊水. 黎得金利必食咖哩雞米, 佢有大細分, 我見網上啲人個個都話細碗唔夠喉, 狠心要左碗大, 但如果預左要繼續食野, 真係唔好貪心. 咖哩雞米精髓係辣椒油溝咖哩湯, 但有人唔食得辣, 幫人頂埋佢匙辣椒油搞到咖哩味無掟企, 而家唔差但要再黎食試真啲, 同埋識食一定係配可樂!

食飽左行路落大三巴, 路程廿分鐘唔算遠亦唔難搵, 係熱左啲. 大三巴前少少有個博物館, 去到就黎收館又要畀入場費, 所以只係上左頂層天台公園吹免費風, 佢啲風仲涼過博物館同某啲餐廳鋪頭, 懷疑係全澳門室外最涼嘅地方😅

差唔多四年無黎澳門, 路過唔少得要影返張指定動作.

明知台灣帝鈞碳烤胡椒餅唔會好食都黎純粹私人原因要打卡

胡椒餅一早入好哂紙袋放爐面, 雖然好夠熱, 但胡椒味弱cry又無肉汁, 差我幾年前係饒河街觀光夜市食九條街, 但近來有人話饒河街而家都整得無以前咁好食😢

跟人行左9曲13彎先黎到呢間隱世小店──最香餅家, 被推杏仁餅, 雖然唔好呢味野但行到黎唔買唔甘心.

未食唔知好唔好食, 食左再報告.

行左好耐先搵到間香港無嘅台飲叫茶麻里, 原來澳門台飲價錢有啲仲貴過香港.

要左綜合水果四季春, 四季春似綠茶但又唔係好綠茶, 因為我唔飲凍綠茶都覺得唔錯. 裡面勁多生果畀埋叉拮黎食, 一路行一路食西瓜好解暑, 如果有叫7分甜效果應該仲理想. 不過佢唔係乜都好飲, 有人叫左杯乜叉玫果, 個味幾似牙膏😑 之後拎住杯野出發去瑪嘉烈葡撻, 點知去到已經收工打掃無得食, 葡撻本來就唔算係我今次目標, 所以先前佢地買左另一間我都無試食, 不過如果我去得到威尼斯人, 都會順路食埋安德魯葡撻. 我原本今次係打算食完金利雞米同胡椒餅, 夠時間就去埋行新八佰伴, 唔夠就只係行威尼斯人, 點知飛的過澳門半島嗰時司機話佢塞左個幾鐘先由半島過到氹仔, 而且至少塞到六點, 即係話我根本無時間返氹仔又再出返半島食晚飯, 情勢所迫變左由朝食到晚😅

食唔到瑪嘉烈葡撻又行返去議事亭, 其中兩個都係好想食多個葡撻就去左鉅記買, 同之前佢地食嗰間一樣又係$10個, 但睇個樣都知好dry, 佢地亦都好順口自然叫左個撻做殼, 睇黎真係乾成殼咁😅 行左成日係時候去厠所放低啲野, 估佢唔到澳門街邊公厠都幾乾淨, 碼頭嗰個更乾淨, 係啲人流咁高嘅地方都可以保持清潔, 仲要街邊公厠無人守係到, 忽然覺得到自己個city係幾咁shit......厠所環節完畢係議事亭搵左個有枱櫈嘅位坐低hea時間等食晚飯, 其實個位就係馬路邊, 頭頂有樹遮蔭, 見啲市民好chill帶埋啤酒係到飲, 平平地都可以好嘆.

晚飯純粹係大伙食飯, 唔係咩特色野, 間鋪唔多客, 好快就上哂菜, 食完飯十點都未夠, 然後坐巴士去外港碼頭, 有啲人仲趕到返尖沙咀尾二班船, 不過我去上環可以坐順風車, 就揀左去港澳碼頭. 呢一日真係好高效率, 由出發已經好有目標性, 一個點接一個點無停, 只係食飯前係街邊坐左陣, 下晝一點先出發, 十二點已經可以返到屋企💪