成日獨孤一味食 #HARIBO 熊仔糖, 近來發現多左隻好食, 不過之前唔見超市有賣, 而家終於有喇! #FruityBussi #果汁流心軟糖 雖然佢賣點係中間有jam流心, 但我鐘意佢係因為透明個層糖仲硬過熊仔糖, 堅好嚼! 個底係雞蛋軟糖蛋白部份嗰種淋淋地, 雖然個底唔係好吸引, 但有透明嗰層一齊食就唔會覺得淋. 一包有三隻味: 紅桑子/橙/芒果, 最好食係橙味, 隻味最出, 橙得黎仲有啲疑似檸檬味. 紅桑子同芒果味就食唔出係紅桑子同芒果, 紅桑子完全無酸味, 亦一啲芒果味都無, 根本講唔出係咩生果, 而且幾甜下, 不過為左可以喪嚼, 會忍唔住係咁食食食😅

$12.9一包, 買兩包平$6.9, 兩包可以唔同款, 即係$9.45一包.

100g/336kcal, 一包我應該分到三四次食, 即係每次大概食100kcal, 感覺一啲都唔過份😅

排排坐,食糖糖~~

紅桑子咬開後個樣幾適合萬聖節用👻

唔好話食唔出芒果味, 睇包裝上啲公仔都唔肯定, 芒果都只係勉強生到又橙又黃又青, 我係見成份有出現過芒果隻字先對號入座.

初時我以為係檸檬味, 因為酸酸地, 睇圖見係橙再嗒真啲又覺得係似橙多啲.