同老豆頂嘴已經差唔多係每次見面都會發生o既事
通常都唔會動真氣 大家互頂完就算
但有時真係會講到面紅耳熱
因為頂受唔住佢D極品膠
不過有時頂下嘴都幾happy
反正每次講嬴o個個一定係我


老豆呢幾日唔知邊條筋又再痴左
好似欠阿媽打咁 不斷搞事
先有一而再 再而三係咁係阿媽專心睇電視時
"了"佢腳板底 俾人鬧完一次過一陣又去"了"
阿媽塊面已經"那"埋一舊鬧佢 佢繼續自得奇樂........
佢玩到無野玩 然後走去打開雪櫃揾野食
去雪櫃搵野食 本來係好平常
但係佢屎忽痕 打開雪櫃對住個內籠大聲唱歌
本來我係房唔知佢做緊d咁"有趣"o既事
但係阿媽一喝:你唔係諗住打開個雪櫃唱歌啊嘛!!!
我就知道老豆又做傻事 真係笑死我
阿媽一邊鬧佢 但一邊又忍唔住笑
我睇唔到老豆個樣 
但係十成估到佢俾阿媽鬧
仲要happy到特登一邊繼續搖埋屎忽繼續唱
呢個係我老豆經典動作


老豆好鐘意撩阿媽 總之就好似d小朋友要引人注意
但我阿媽其實係幾高鬥o既人 有時真係唔鬼采佢
有次阿媽坐係sofa睇電視 唔理佢
老豆見到阿媽隻耳仔紅左
佢好鬼細心咁跪係側邊幫阿媽隻耳仔搽膏
但阿媽眼尾都無SO佢
我見到都覺得骨痺
不過老豆而家每個星期有兩三日都會返大陸
佢成日話自己係上面有N個老婆
我就真係唔知佢講真定講笑
因為返得真係超密 密得有D唔正常
但係我覺得佢唔至於包二奶
但係有無ONS就真係唔知喇


然後琴日我地又拗去旅行o既事
老豆係一個超級自我中心o既人
自我中心到自我中心都唔會收佢
佢自己認為左o既野就認死左一定係咁
但係佢有時認為o既野真係好膠
例子.........
1.佢認為潮州人就一定係衰人
2. 發生車禍一定係因為司機開快車
    佢從來唔相信機件故障等等非人為o既可能
    最搞笑係 就算俾人撞死o個個 而唔係撞人o個個
    佢都認為佢一定係開緊快車
仲有我老豆份人超記仇 你同佢結怨o既話
佢真係連邊年邊月邊日 因邊句說話同人發生恩怨
佢都記得清清楚楚
所以阿媽話得罪親老豆真係俾佢記足一世仇
琴日嘈交又講起呢個問題
之後我同老豆阿媽講左一個道理
我話你知唔知點解呢個世界會有"一失足成千古恨"呢句說話
阿媽好自然話唔知 老豆唔出聲 因為知我又搵位串佢
我就繼續講話: 一失足之所以成千古恨 就係因為無人肯俾機會佢改過
就係因為有老豆呢D人存在 人地做錯野就記足佢一世仇
人地就算有心想道歉 都無機會"
真係寧得罪女人 都唔好得罪老豆


仲有前兩三日佢問我 而家去上海好唔好
我就話唔好住 不如過左奧運先
我覺得而家國內好似有d混亂
然後佢琴日就同我講佢已經報左團 呢個星期五去
其實佢自己想去就會去 我話唔好佢都唔會聽
真係覺得佢問我都多餘
之後佢話佢終於可以了結一個心願
因為去上海係佢一直以來想做o既事
........我無言
佢每個星期都返大陸
係佢自己一直唔去上海
好似講到上海離佢十萬八千遠.........
而家終於排除萬難去到上海
我只好OS一句:恭喜你終於等到喇!! 去上海架飛機剛剛做起左
之後佢仲要大大聲話 上海係中國最靚o既地方
北京同佢無得比 我即刻火都黎 見佢咁踩北京
但係我最起火個point係 佢連上海都未去過
就話佢一定係中國最好o既地方
情況就好似未食過龍肉o既人話龍肉係最好食咁膠
所以之後我地自然又大戰一輪
仲有我覺得老豆去旅行o既文化水平太低
佢成日跟D平價豬仔團 走馬看花 D領隊主要帶你去買野
阿媽話佢參加係因為佢只係想俾自己去過見過o個個地方
可以話俾人聽佢去過 
佢都唔係真係要享受同體會一個地方 一個經歷
講真 我真係有D睇唔起咁o既行為
為去而去 佢認為去得最多個景點就係最好
我心諗 你估家下玩check point咩 鬥多咁話
我去旅行有時去得最多次同埋留得最長時間
可能係酒店附近o既coffee shop
你話我浪費時間 我話你ON9就真

 

最後玩出賣
我好仁慈咁幫佢已經"打格仔"

20080623124906552.jpg.jpg
我稱佢為"肉蛆爸"
我老豆好鐘意訓地下
有時打開房門就見到一條大"肉蛆"訓係到
阿媽話佢咁做係因為地下涼......
我即刻聯想到D狗
D狗都係好鐘意趴起地下透涼= =
佢仲要訓到半醒半睡講左句: 個地下太硬唔好訓
阿媽即刻回佢: 有床係你自己唔去訓
我亦都撘左個訕: 呢D叫柯屎唔出賴地硬

 

雖然我認為我老豆係一個Above Average o既老豆
但始終唔可以抹殺佢膠o既事實

arrow
arrow
    全站熱搜

    永藍蝶 發表在 痞客邦 留言(0) 人氣()