而家要搵餐廿蚊食得飽o既難度真係同中六合彩三個字有得fight
當然唔係話唔知邊到有 比如吉野嗎o既下午茶就係一線曙光o既存在
但要食到都需要講求天時地利人和
打工仔又可唔可以出去食個tea當lunch先

所以當呢到可以做到廿蚊餵飽我 
唔推一推半夜訓着都會覺得內疚

廿蚊兩餸一麵 凍飲熱飲同價六蚊
當然講梗廿蚊食得飽首先就唔可以要求配套完善
要有得飲有得食就唔係呢個價
但係加個凍飲都係埋單廿六蚊 仍然錢服口服吧
選擇方面提供o既麵類唔會陌生 但餸就有啲較為罕見o既選擇
比如羅漢齋/爽肚/鳳爪/魚崧/炸班腩 平時食其他車仔麵唔多覺有
*溫馨提示：炸班腩落左水其實唔係幾好食

即使只係食齋o既人黎到呢到都有返六七個餸可以揀下

廿蚊之所以食得飽 都要配合先天條件個人唔係特別大食
只要一般食量o既女仔都會夠飽 因為呢到比o既餸係特別多
一碗豬皮蘿蔔加幼麵 啲豬皮多到呢......

六蚊一個餸 講真出面一串豬腸六蚊都買唔到啦
就咁睇相數面嗰層都有成九舊 食一串都唔知有無咁多
豬腸無臭味 有肉地咬起上黎彈下彈下~~
豬紅又係常叫之選 雖然未至於滑到無朋友
但至少食起上黎唔會有渣o既感覺 不算超滑但仍然很滑
要重點一提呢到o既幼麵 佢唔係雲吞麵嗰種幼麵
所以唔駛怕有梘水味 佢似係蝦子麵嗰種口感
但肯定唔係蝦子麵 可能係全蛋麵掛
麵呢家野 我識條毛咩
我只係知到好食

炸豆腐大大件咬落去有肉地 炸過o既表皮再吸埋啲湯好有口感又惹味
牛腩請慎點 真係為左寫呢篇食評先叫
平時無乜留意佢 黎到先知佢似係近在腩位o既沙嗲牛........
又唔係唔好食 不過唔係我所期待o既樣囉

"心理上"想食得清淡啲o既時候會叫個羅漢齋
貪佢一個餸有好多樣野 枝竹/豆卜/椰菜/蘿蔔/草菇/冬菇/粟米芯
呢啲野都幾吸湯味 尤其當豆卜吸哂湯食起上黎一啲都唔寡
牛肚久唔久都會叫下 貪佢有咬口
雖然已經軟身易咬 但又未至於超淋
牙痕o既時候咬下呢個都唔錯 

每次黎多數唔係食幼麵就係公仔麵
唔係其他麵唔好食 而係呢兩種麵特別好食
平時外面食出前一丁都要加錢 呢到o既公仔麵唔係出前一丁
唔駛加錢之餘但質素同出前一丁有得fight
唔敢講佢一定好過出前一丁
但係二揀一的話我會揀呢到o既公仔麵
不過唔排除覺得佢好食啲係因為佢地能夠將個麵煮到剛剛好
少少硬好有口感【不過都試過佢地失手將個麵煮得太硬...........
雖然佢地個沙嗲汁唔係有咩特色
但公仔麵配左沙嗲汁始終都係要再加分！

野飲方面 99%都係叫熱奶茶
飲得出比一般茶餐廳濃稠 並非偏水狀 有幼滑感
但又未至於the best 不過已屬中上水平

既然熱奶茶唔錯寫得食評就想試埋佢個凍奶茶
今次係第一次飲 可惜維持唔到熱奶茶o既質素
甜度係適中 但加左冰無左奶茶o既香濃
還是熱奶茶最好

除左lunch會黎食車仔麵 早餐都有食過佢啲腸粉燒賣
不過質素就麻麻地 燒賣有時過硬 有時又淋過頭
腸粉同啲醬唔見得好過七仔
總之口感幾時食都係唔多好
不過食包做早餐食到悶都會買黎食下

早餐仲有賣炒米粉都幾抵食下
九蚊一大包 分兩日早餐食都夠
但未免過份正宗炒米粉 因為真係得米粉
菜都唔多幾條 係得匙辣椒油點綴下【咁實情都有咬過一兩條菜絲咁大把o既......
好在佢個咸味都夠 食落唔會淡茂茂
但無返少少配料始終感覺好dry
講到底還是車仔麵最好

最後講講呢到o既環境氣氛
好有本土氣息 環境殘殘地 近似大牌檔
坐o既係任人掟黎掟去o既膠凳
阿姐哥仔個個做野快手快腳 你行慢啲都會趕你入去坐低
有位哥仔把口對客係串串地 但有時講野幾好笑 
額頭好似永遠鑿住 “我很醒目 請你不要太傻” 哈哈！
我覺得係一種style 所以唔可以拎酒店服務態度去比話佢地差
反而覺得餐廳有一份朝氣 每個人係自己o既崗位多啲黎密啲手
非常純熟 唔會hea做唔理客
唔知呢種算唔算係以往o既香港精神呢:)