父親節前一日去飲茶 諗住會好多人
點知又無喎 只係前面有兩個人等緊一張枱
等位期間無野做望下知客有乜搞作
本身佢皮膚偏黑加上全程黑面 可謂相得益彰
酒樓位於旅遊區 自然有外國人黎
有兩個唔知韓國定日本女仔入黎 唔識英文
知客同佢雞同鴨講 神情語氣擺明勁唔想應酬佢
到排我前面兩個人有位 因為佢地自己傾計傾得太投入
聽唔到叫飛 個知客係佢自己個位勁大聲不斷重覆喪叫
頂 全場得我唔係就佢等緊位
你行過去叫一聲唔會即刻斷腳嘛
如果返工容許講粗口 佢應該好樂意係佢自己個位直接大聲問候人地娘親了
到我有位 佢係張紙仔寫低枱號同幾多位
我拎住張紙仔行上樓梯 上到去無人帶位都算
問阿姐指我行去右邊 問題係我行去右邊都唔知邊張枱係98號架
佢又唔係好似一般酒樓咁有個三角牌清楚寫住枱號
後來先發現佢將個枱號刻係一個入住點心紙o既皮套上 
但個套係平放枱面 啲客行過點自己搵枱號呢
唔想請咁多人服侍客就自己係配套上做好啲先啦

之後行到右邊見到有張四人枱有個阿姐執緊
雖然睇唔到枱號 但我諗我地三個人應該係安排坐呢張
於是企定係到等佢執 忽然另一個阿姐叫我地去窗邊已經執好o既大枱坐
咁我地照行過去 諗住畀得大枱轉頭可能都要同人搭枱
不過窗邊景又好啲 所以無所謂啦
點知我地坐低左就hihi了 兩個阿姐係到嘈交
執緊張四人枱嗰件 vs 叫我地坐窗邊嗰件
執緊四人枱嗰件睇唔過眼我地三個人竟然坐大枱
但叫我地坐大枱嗰件又唔聽佢支笛
佢地係到嘈 完全無視我地三個 無人同我地開位開茶 
我地又唔知要唔要搬位 苦等無用
最後我地咱有自己搵其他侍應開位開茶
吹脹

根本間酒樓本身就無乜細枱 我地側邊幾張窗邊大枱都係得兩三個人坐
同埋父親節前夕都仲有唔少吉左o既大枱
我地要等位係因為唔想放大枱畀排我前面嗰兩個人同我地三個人咋嘛 
仲有係到逗留兩個鐘 我視線範圍前前後後五六張枱都怨聲四起
唔係嘈無人落點心 就係嘈無人加水 又或者等左成世都無人埋單
有啲嬲到話想唔畀錢走人 反正佢地都唔願收........

搞左一輪終於可以食野
上點心速度幾快 鮑魚汁炆鳳爪做得唔錯
夠入味 同埋鐘意佢唔會炆到淋patpat
淋得黎又有返少少咬口 唔會一咬就散到甩皮甩骨

桂林煎蝦餅雖然煎得夠香口 但味道普通而且唔多覺有蝦味
我老豆仲以係佢係煎魚餅 以大點黎講唔值

呢個韭黃鮮蝦腸粉正在啲蝦又大又爽
遺憾係我無打直同佢影一張相
我由前世都未食過腸粉皮可以厚過面皮厚o既人
口感至少有3毫米厚 佢係厚到點吸豉油都會覺得好淡
我好懷疑啲蝦唔係煮熟而死 而係畀塊腸粉皮焗死
蝦啊蝦 你死得好慘呀

因為叫左呢個原隻鮑魚荷葉飯 唔敢叫太多點心
睇相見佢幾大隻而且賣$48 估計份量唔細
但黎到之後深深明白到"圖片只供參考"的不變定律
大細連糯米雞都比唔上 

細同貴都算喇 仲要難食
啲米碎又鞋口 完全唔知自己食緊乜
荷葉香更加唔駛諗啦

呢個鮮竹魚肚滑雞扎係我咱一真係欣賞o既點心
魚肚同雞又滑又入味 仲有我最愛嗰條火腿
由細到大食雞扎都係為左追求嗰條火腿
但而家有啲酒樓已經out左佢
而且佢仲加左條扮嗰條火腿o既雞脾菇XDD
雞脾菇夠厚肉 索哂啲汁軟軟滑滑好正

雨花海蜇頭本身食材質素係好 新鮮爽口
可惜輸哂係個汁到 本來我以為佢畀我嗰兜係酸汁
點左放落口鬼咁苦先知原來係芥辣
但芥辣會咁苦依然係一個迷
之後無再點個醬 只係得返淋左係海蜇o既麻油味
本身海蜇就無乜味加上麻油係香但味道偏淡
所以成碟野好淡口 

京蔥煎烹胡椒包賣相吸引 但食一啖就原形畢露
個饀太濃味 死咸死咸好很味精
口感上食唔到有料 總之咬到裡面成口都只係醬
包又煎得唔夠香口 金玉其外敗絮其中

唔知係咪自己天生有食神命 導致平生未食過咁難食o既紫米鮮椰露
估唔到反而畀我係呢啲消費水平較高o既酒樓終於遇上
呢碗野就好似琴晚佢地晚市送淨o既糖水再加工
第二日溝水拎出黎賣 椰汁好稀好淡唔甜 
紫米睇黎琴晚已經挖哂畀客所淨無幾
所以得返幾粒係到點綴下 
雖然話只係小點 但都要廿幾蚊 
駛唔駛差到咁離地呀

成間酒樓係得個窗外景好 但個景又唔係佢製造o既
係咁難食o既野同咁差o既服務底下 令個景睇落都無咁開心
間酒樓係污染緊個景囉
價錢比一般酒樓貴一倍有多 回報係難食返一倍有突
係旅遊區做生意仲要啲服務差到咁
香港名聲真係要多謝你
我其實唔係第一次黎 上一次情況大不同
雖然係貴 但無而家咁貴
雖然唔叫好好食 但有靚景安慰住都可以接受 同埋唔會到難食
嗰時服務唔錯 總之感覺貴得黎都仲值
而家唔知做乜變左下三流賤質
佢係差到我唔會想畀多次機會佢睇下將來又無變好！