唔知點解香港人咁鐘意食譚仔
不過我自己對譚仔一向好感麻麻
首先佢o既湯底同食材質量我覺得唔夠另一間米線鋪好
其次佢提供o既配餸選譯唔係咁得我歡心
不過如果要食米線 我都唔抗拒食佢
佢並唔係差 只係唔係我心頭好
但係好多只係短暫離開香港o既人都會表示好掛住譚仔
譚仔好似已經成為香港人o既集體回憶
可能三哥有見及此好貼心咁係機場開分店
等大家一落機就可以衝去食

首先坐低即黎一條數學題
兩餸清湯連凍熱飲品套餐$44
但因為我喉嚨痛到火燒自以為飲檸蜜會好啲
而阿姐表示檸蜜唔係套餐範圍內只可以散叫
所以最後兩餸清湯連熱檸蜜$47
回顧餐牌可見套餐範圍內o既飲品同檸蜜只係相差$1
一出左套餐就要加$3 所謂生意手法層出不窮
呢兩蚊抵畀當學野XDD 

其實本身唔多鐘意飲檸蜜 所以平時無乜飲咁濟
無得比較唔知呢杯叫做好定唔好
但至少唔難飲 不過好甜就一定
叫阿姐拎杯滾水 飲下又加下
做到好似買一送一o既效果XDD
不過真係建議怕甜人士唔好叫

如果多啲韭菜同芽菜就好喇 不過送o既都算係咁
但有驚喜係送左唔少腐皮 第一次食譚仔畀咁多腐皮
其實呢三樣配菜係邊間米線鋪食都唔係好明顯感受到佢咩味
主要都係感受下佢o既口感 有啲菜咬下清新啲
同埋腐皮吸左湯好滑o既感覺
至於個湯底無乜特別感覺 無讚無彈總之夠咸

雞肉好似係譚仔o既皇牌 好多人叫
但一直覺得譚仔o既雞肉係好奇怪
好淋好霉o既質感 唔係餐牌話佢係雞肉我都唔知命名佢咩肉
硬係好似唔知點樣合成出黎
每次食佢都會諗起KFC啲雞無頭呢個傳聞.......
我自己覺得佢唔叫好食但又唔難食
不過下次我應該唔會再叫

炸醬又係譚仔另一皇牌
係我心目中炸醬應該辣先好 但譚仔o既炸醬係甜為主帶微辣
不過呢個都唔錯 啲醬滑溜溜
係每匙米線上面搽少少送入口甜甜地都幾惹味
而且佢o既微辣又可以做返少少香辣感覺

譚仔o既米線對我黎講係偏淋 而我鐘意食偏硬
呢個係其中一個好大原因譚仔唔能夠成為我心頭好
不過佢絕對唔係淋得過份 純粹人各有志
而且因為呢日喉嚨痛 食到偏淋o既米線反而感覺唔錯

雖然譚仔唔係我心頭好 但我一日未死都仲有機會食到佢XDDD