一個平時唔多食三哥o既人連續三個星期六去食三哥探討食三哥o既點餸策略......呢次點左豬膶竹苼酸菜酸辣湯底米線.

豬膶唔係第一次食, 但第一次食係外賣拎返屋企, 嗰次非常差, 苦味好重, 但基於嗰次係外賣, 拎返屋企都要半個鐘, 當係受外賣影響畀多次機會佢. 呢次去返外賣嗰次同一間分店, 堂食個豬膶又真係好左喎, 無乜苦味, 整體唔差, 若然口感再爽啲, 肉地厚啲就好喇, 而家個質素未能打入Top 3, 但都係有興趣再點o既餸.

竹笙本身無乜味, 我諗佢o既存在係為左食佢個爽爽地吸哂湯o既口感, 佢又真係做到爽爽地吸哂湯, 不過唔係好打動到我, 覺得平平無奇, 純粹覺得有啲野係個口"殺殺"聲, 仲要比其他餸貴$2, 以後唔打算再點.

酸菜正啊喂！一食就要入Top 1！佢正在係夠酸得黎又有種好似經過發酵先會有o既辣味, 味道係先酸後辣符合我其實唔多鐘意酸辣同製o既喜好, 仲有啲酸菜好爽口♡(ˉ﹃ˉ)

經過連續三星期深入"虎穴", 加埋以前食過三四次o既經驗, 唔計嗰啲一睇就唔會點o既餸, 已經將我打算試o既餸食過哂, 我o既Top 3係酸菜>腩肉>墨丸, 如果呢三樣食悶左會叫下豬膶、炸醬、腐皮. 雖然上星期點腐皮未如理想, 但係明明附送嗰啲係OK嗰喎, 而且我本身都鐘意食腐皮, 所以未捨得放棄佢. 仲有小食未研究完, 不過連續食左三個星期係時候要停一下, 小食策略要留待下回分解了.