而家啲自助餐貴到離哂地, 真係唔覺得值得去食, 以前都有兩間心水buffet, 但呢一兩年再食又係水準遠遠追唔上收費, 總之感覺係食邊間就死喺嗰一間......但今晚呢間有驚喜喎, 竟然拎得返黎都食哂咁濟, 命中率達95%, 食物款色啱心水, 選擇又多, 只要想食嘅都食一啖已經可以搞出人命, 不負 #自助山 之名. 除左負責我地個侍應好似未訓醒咁, 同埋我唔多想間餐廳會轉, 當食到好飽嗰時小小轉真係有啲想嘔, 以自助餐呢啲雜食地方不要苛求精品, 佢平均水準真係算高. 如果點都預左筆錢唔抵都要食一次自助餐, 我會再揀自助山. #灣仔皇后大道東183號合和中心62樓

雖然間餐廳會轉, 但其實夜媽媽無乜野睇到. 同埋開車黎真係轉到頭都暈, 要拎free parking又要62樓落返x樓再轉lift到3樓攞飛再上返17樓轉lift落返1x樓拎車, 再無限轉住圈開車到17樓離開......我都唔知有冇記錯, 人已暈......

刺身蝦好甜, 有啲裡面仲有蝦籽, 但真係無Quota食多round. 壽司都正, 除左有舊吉列蝦卷唔脆, 食過嘅都好味~~

鵝肝任食超正, 仲要大大舊. 肉眼扒好juicy, 松露炒蛋松露味好出, 食得生野多飲個冬陰功係幾爽, 辣度係親民得黎又唔會無料到, 但今晚劇情需要好多野食都無影相.

甜品選擇唔算太多, 但係拎得返黎都無食淨, 榴槤控應該會戀上佢個榴槤糯米磁, 裡面根本就係成舊榴槤, 佢仲有個榴槤燉蛋物體, 我無食到但收到feedback又係重口味, 另外焦糖味macaroon都值得推一推👍 

呢個芝士撻拎完一次又一次然後再一次, 撻皮脆, 芝士又香又滑裡面仲有少少檸檬味, 食幾個都唔覺漏仲想繼續食~~~