本來話要排長龍就無乜興趣再黎食, 但樣衰衰竟然對個蝴蝶粉有啲心掛掛, 於是又黎多次. 慶幸星期一晚拎左飛後去行街, 再返黎唔駛等幾耐就入得, 而且話就話限食兩個鐘, 但係過鐘唔會趕人, 九點後已經有吉枱. 食埋今次近期真係唔會再主動提出黎呢到食, 因為今次啲野麻麻地, 而且個蝴蝶粉已經食到夠哂……
得兩個人所以只係叫左兩個主菜, 而且兩個人根本食一個主菜加件蛋糕都夠飽. 呢到食物份量真係好大, 同埋餐廳做法係一次過上哂大部份食物, 食得快飽得快.
烤蒜雞肉蝴蝶粉唔多講, 同上次差唔多, 不過啲雞肉無上次咁鞋, 但都唔會係嫩, 我諗要撞手神, 下次可能又鞋返, 總之呢碟野食蝴蝶粉已經滿足.
我地畀呢碟叫"羅馬諾芝士脆皮雞扒"嘅野fake左, 睇名以為主打係芝士同雞扒, 點知上到黎有勁大堆意粉, 但我地已經有蝴蝶粉, 要食兩盤意粉超哂額, 好心中文名寫埋意粉兩個字…….講返雞扒, 啲雞壓到好薄, 整到咁薄再拎去炸食落好少會鞋, 但當然都食得出唔係畀滑野你. 雞扒好香, 塊皮有啲好似焗到燶邊烤出黎嘅香味, 但件雞一啲都無燶到, 我比喻佢為更好味版麥樂雞, 但要畀多十倍價錢, 又好似唔係咁值. 最大問題係成碟野都食唔到同見唔到芝士, 咁碟野點解叫芝士脆皮雞扒? 咱有自我安慰嗰啲好香嘅氣味黎自芝士, 所以係芝士脆皮, 並唔係單獨有芝士, 仲要係聞到食唔到……意粉配蕃茄汁, 意粉口感OK唔太淋, 蕃茄味幾鮮, 因為佢唔多甜突出到蕃茄嘅酸味, 但就唔係好夠濃, 我要再落鹽吊味, 所以食落其實普普通通. 總之呢碟野感覺係錯哂, 一啲芝士都食唔到, 諗住主打食雞變左食意粉.
鹹焦糖芝士蛋糕成八十蚊一件, 份量真係唔野少, 雖然食得出鹹焦糖味, 但由於太甜嘅關係, 其實唔係好感覺到, 被麻木左, 只係覺得好甜好甜好甜, 不過以甜品黎講佢個太甜唔算令人討厭, 都食得到, 但呢個甜度一次就夠哂數.
唔講味道, 其實呢個質地已經注定係我食唔到嘅野, 蛋糕部份淋到好似mousse咁, 而我係好憎食mousse, 我唔敢講咁樣叫差, 因為有人可能鐘意食淋野, 但如果想食New York Cheese Cake嗰種質地, 呢個一定唔係. 至於餅底部份就似濕左嘅Brownie, 但濕極都比蛋糕部份硬好多, 所以我比較接受餅底, 但問題都係太甜, 食唔得多.
呢到啲野實在太大份, 兩個主菜都食淨半碟要打包, 外賣盒幾靚仔, 起碼唔係成日見到悶嗰啲樣先. 其實今餐份量三個人食都一定夠, 所以除返開係抵食, 但芝士雞同蛋糕都麻麻地, 所以感覺比上次黎差啲, 而個蝴蝶粉打包完我都要分兩次早餐先食得哂, 已經食夠皮, 所以真係暫時無牽無掛了. Goodbye The Cheesecake Factory~
留言列表