之前多數食千両, 但只係無得揀之中嘅選擇, 因為遇唔到邊到壽司刺身新鮮過佢, 但自從食左穴之後真係返唔到轉頭, 除左新鮮程度更高之外, 佢解決左我最唔鐘意千両嘅問題, 就係食物選擇太少. 每次去穴都食出放題嘅感覺, 打開menu勁多野都啱食, 啲選擇又唔會太平凡悶場, 當然成日食係會悶, 因為佢唔會點轉款, 但我一個月食一次都無問題.

刺身組合好啱我心水, 件件都想食.

不過呢次去覺得刺身水準有一點點下降, 有啲乾身嘅感覺, 同埋海膽鮮而不夠甜, 但唔影響我對佢嘅信心💪

章紅魚柚子酢沙律鐘意佢酸酸甜甜, 有啲菜清下個口, 不過章紅魚同刺身拼盤一樣有啲乾.

火炙左口魚裙邊係我至愛, 嗰股油脂香真係掀起高潮, 令人好滿足. 鰻魚我無食到, 但係咁長卷住舊飯, 目測又係個味勁出, 又有少少飯中和下唔會太漏.

印象中北海道帶子壽司水份OK, 但係深海池魚都係有唔夠水情況, 當日刺身食法嘅魚都有呢個情況, 不過點左豉油食問題不大.

咁多好野食, 豚肉烏冬自然無乜吸引力, 所以我無食到豬肉, 只係食左兩啖烏冬. 烏冬口感好滑, 但唔係好彈, 淋左啲, 唔係差, 但唔係我追求嘅口感.

雜錦天婦羅食左蝦同粟米, 質素有保證, 但我會想隻蝦個炸皮再脆啲. 第一次食天婦羅粟米, 有驚喜喎, 爽得黎條粟米又脆, 平野都有佢嘅特色.

呢個蠔堅貴, $98一隻, 但無需要食, 我覺得咸過頭掩蓋左鮮味, 同行人就話調味料放太多, 食唔到蠔嘅原汁原味. 不過又唔係話好差, 只係實在太貴, 如果三四十蚊隻我會食, 因為佢creamy程度唔錯.

燒銀鱈魚又係正嘅, 勁嫩滑, 夾都夾唔住. 一定要點沙律醬! 沙律醬嘅酸酸甜甜令成個味好鮮明開胃, 加強追吃性.

燒鱔呢種食法突出魚肉嘅嚼頭, 咬嗰時真係有彈下彈下嘅感覺, 表面又脆脆地, 好香😍

和牛係每次必食, 勁柔軟嫩口之餘仲要係滑. 從來食豬牛羊都唔會畀到滑嘅感覺我, 通常都係嫩, 只有雞可以做到呢種效果, 但係呢到嘅和牛係可以食出滑嘅感覺, 仲要係唔貴, 約莫兩舊水有交易, 好抵!

平時食燒牛舌多, 鐘意佢爽口有嚼頭咬得下, 所以估佢唔到酢麵豉軟牛舌堅係軟, 但竟然仲識彈, 厚切程度更係超乎我想像, 第一次食到咁軟彈厚嘅牛舌, 好享受咬嘅過程.

燒羊架又係厚切, 不過因為豬牛羊呢類肉唔會好淋, 咁厚其實食得有啲吃力, 影響口感無咁嫩, 切返薄少少會好啲. 羊膻味同坊間食到嘅差唔多, 唔會好勁, 唔多食羊嘅人應該都接受到, 好似我咁鐘意食羊就梗係唔夠喉.

鵝肝壽司超級厚切, 一咬落去濃郁嘅油脂香衝出黎, 呢啲又油又香又濃味嘅正野, 最啱做野攰到死嘅時候食, 瞬間有充電感覺, 有返小小人生樂趣.

今餐食到人均八百蚊係貴, 但其實唔叫海膽同蠔仲好, 反正味道唔係咁值個價, 唔要六百有交易, 而且我地份量叫得多過頭, 我平時多數五百幾可以埋單, 當日過度放縱😅 五百蚊雖然都唔平, 差唔多係放題一倍價錢, 但係呢到無限時, 最重要係食物質素好好好好多, 辛苦搵黎志在食, 我會鐘意食呢到多過放題. 仲有當日服務特別好, 完全歸功於一位服務員, 由等位開始就照顧我地食到尾, 知我地Lunch趕時間又要喪食, 等位嗰時已經幫我地落定單. 怕我地食唔哂又幫我地揀起一啲食物唔落住, 就黎食完又主動黎睇下有乜要打包, 雖然只係食淨一件羊架咁大把都拎去幫我地入盒, 真係唔話得, 希望下次去都可以再遇到呢位哥哥仔😘