對上一次黎食原來已經係八個月前, 以為而家出面咁多課外活動唔駛排咁耐, 點知都係要排大半個鐘, 但嗰日情緒低落, 諗黎諗去, 近我嘅餐廳只有呢到個意粉可以安慰下我, 所以要排都照等.

呢個烤蒜雞肉蝴蝶粉從來無令我失望, 雖然佢啲雞亦都一直係鞋, 品質從頭到尾無變, 芝士忌廉汁夠哂濃, 不過佢芝士味一向唔算好重, 而係成個味好香夠濃, 就係呢種濃郁味道令人產生安慰感. 醬汁質地少少厚黏得住蝴蝶粉, 又唔會太杰, 食極把口都唔覺漏, 會追住食. 不過把口唔漏, 個肚都有上限, 蝴蝶粉幾頂肚, 兩個人食三分二已經夠哂, 就算個肚仲可以放其他野, 但偏偏再放唔落蝴蝶粉. 仲有個人唔開心, 食蝴蝶粉慳氣力, 一粒粒用匙筆黎食, 唔駛食意粉咁要卷, 唔卷又吊吊fling, 蝴蝶粉少少硬, 一粒粒狠狠咁咬發洩下對精神有丁丁幫助😅

雖然香草三文魚上面鋪滿香草, 但只係掩眼法其實無咩味, 件魚我都有落返少少鹽吊味. 我揀呢個係因為佢用檸檬汁, 諗住蝴蝶粉咁濃味, 食返啲酸野清新一下. 個汁其實酸酸地幾好味, 但感覺同食材唔多夾, 食落感覺汁還汁, 食物還食物, 兩者互不相干. 薯蓉畀好多, 但係無乜味, 有啲乾, 個汁又唔係好幫到佢. 蘆筍最出色, 平時配菜好少畀咁粗, 新鮮爽口. 整體無吸引人嘅特點, 但一啲都唔難食, 魚肉就算淡淡地都有香, 不過近三百蚊就唔太抵, 無下次.

呢到啲麵包比一般餐廳硬, 唔差, 但可唔食, 不過我鐘意用普通嗰隻麵包點蝴蝶粉個汁, 奶盡佢🤣 另一款係黑糖麵包, 之前覺得黑糖味唔係好夠, 今次濃返味道有進步, 但要個包軟啲先夠吸引.

食左幾次, 今次又寫其實係因為呢杯酒引起, 之前黎食叫左杯Sparkling wine-COVA太酸澀, 都係睇返之前食評先無再伏. 今次揀左Sparkling wine-PROSECCO相對好飲好多, 無酸澀情況, 甜甜地有啲氣好易入口, 我當場飲左兩杯, 不過未至於令人懷念, 但下次想飲有氣嘅野又嫌水太淡汽水太甜可以encore.

呢間餐廳個名叫The Cheesecake Factory, 芝士蛋糕係佢嘅經典, 但我偏偏對呢樣野最無興趣, 因為超級甜. 我鐘意黎呢到食意粉, 夠濃味兼有芝士, 個人好頹嗰時食左個心會舒服啲, 所以只要意粉依然好食, 我黎呢到已經達到目的, 唔要求佢多方面都出色.