🏠澳洲牛奶公司@佐敦白加士街47-49號
餐廳收9pm, 8點先剷落去, 配搭毛毛細雨, 果然唔駛排隊, 但呢個唔係重點, 重點係伙計叔叔會笑! 會笑! 係笑容啊~其實今晚都八成滿, 不過唔駛打仗, 加上我落單快到阿叔寫唔切, 無位畀佢吹我, 然後佢笑住覆我一次有無落錯. 理論係當你落單快過阿叔支筆就會產生速度快過光速嘅效果......bullshit

🍲叉燒通粉/意粉: 老老實實麻麻地, 意粉太淋, 通粉普通, 叉燒偏薄無乜口感.
🍳炒蛋/煎蛋: 蛋係澳牛嘅靈魂, 炒蛋真係又香又滑, 蛋黃味好重, 煎蛋可以前後蛋白都煎哂中間流心又唔穿.
🍞多士: 厚切加溶哂嘅牛油好香, 不過再烘多陣挺身啲會有更好口感.
🍖火腿: 唔起眼嘅野但都覺得好食啲, 唔會乾爭爭鞋口, 同埋味道幾突出, 有時出面食嗰啲就咁一塊無味嘅野咁.
🍮蛋白燉鮮奶($30): 真係好滑, 裡面偏液態半固體火候啱啱好, 但係太甜, 一個人食半碗已達上限. 唔記得相機食先碗野無左忽...
☕茶走/杏霜: 茶走要少甜都甜過燉蛋, 似乎水吧大佬豪放型不解少甜, 建議自己落返沙糖掌握命運, 不過茶味係得嘅, 濃郁又無苦澀. 杏霜唔錯, 唔落糖已經夠甜, 唔會太多嘔吐味.

🤓結論: 火腿蛋多士先係主角, 碗粉只係用黎塞飽埋個肚, 燉蛋如果政府發出一人限聚令就唔食得. 澳牛可以食, 但不至於要排隊食.
💯分數: 4.83 out of 7