#你知道嗎 好多人叫捧狀餅乾做百力滋, 但其實#百力滋 = #Pretz, 即係咸嗰啲, 甜嗰啲叫#Pocky (#百奇), 係兩樣野黎, 至於售價, 個人所見普遍Pocky比Pretz貴. 不過大家叫慣左明就ok, 呢個知就算, 絕對唔影響味道:p

兩盒係唔同地方買, 黑色係香辣燒烤味($5.5), 橙色係冬蔭功味($6), 好平.

泰國版有標籤說明, 但老老豆豆, 啲營養數據有啲對唔返, 我讀得書少, 你唔好呃我, 數字我畢左業好耐!

泰文係我目前聽過最開心o既語言, 因為聽佢地講野就算唔知內容都好想笑, 尤其當佢地情深款款講對白   

先食香辣燒烤味, 好鬼幼, 幼到都唔似餅乾, 脆好多, 口感幾似童星點心麵, 但勁多味精粉, 又似食梗媽咪麵, 啲粉係多到一枱都係, mouse有如沙上行走......呢包野係咪童星點心麵同媽咪麵o既私生子? 味道就好合符佢o既描述, 真係有明顯辣味, 又有少少少燒濃野食陣味, 不過好食就無佢份, 味精太重, 濃味又咸, 激發喪飲汽水欲望!

之後到冬蔭功味, 呢個去返平時咁粗, 都係咁先好食, 我唔想食一條直左o既媽咪麵......跌粉睇落無咁嚴重, 不過可能純粹幻覺, 因為食落都係重味精, 但因為冬蔭功味有酸助陣食落無咁死咸, 無咁漏, 呢個貪佢平平地都可以隔好耐翻單一次. 

一條冬蔭功味等如1.5/2條香辣燒烤味, 仲有泰版百力滋比平時食開嗰啲短.