係今年六月尾我買左一張六合彩
由係香港買到而家返黎荒野
仲開左學都兩weeks
直到今日為止已經係最後一期
仍然係維持住廿蚊都唔中 

諗返起好想中六合彩呢回事
大概係三年幾前發生
唔會期期買 不過成日都諗住去買
因為好想中 好想有錢之後去做一件事
然後不知不覺就斷斷續續買左三年
或者真係好傻 會覺得有一日真係會俾我中到
然後俾我做到我想做o既事
同樣地好傻 我以為有錢我就可以有機會彌補返
我從未得到過 但又覺得失去左o既野

今次返香港 我返去之前已經mark低係schedule
一定要買廿期六合彩 要由香港買到返黎荒野
要當我係世界不同角落既時候 佢都會一期一期咁開
我想同命運賭一次
只要係途中既一期中到頭奬 以前所有一切我都會完全忘記
就等個故事莫名其妙咁係呢一刻開始

8月9日最後一期 我仍然係無中到
我唔覺得好可惜 因為係我未知道開咩number o既時候
我不期然先問左自己一次 如果呢期真係俾我中到頭奬
我仲會唔會去做o個件事 我好肯定答左我唔會
今次出去 我之前都仲好猶豫應唔應該去
我唔知自己到底想唔想去面對答案
我唔知自己頂唔頂得住 或者我真係會突然一走了之
我唔記得我係人前人後喊左幾多次
我只係記得我係每一個國家都喊過

今日最後一期六合彩 我已經唔再需要變得好有好有錢
因為係過去一個月 我見到太多太多事情
雖然好多好多我都仲未真正明白 但係至少有一件事我知道左
有一樣對我生命好重要既野 我從來未徹徹底底得到過
但卻連同我僅有既都失去得徹徹底底
以後我都唔需要再掛住買六合彩