#Pie&Tart 係少年回憶, 中學嗰時好hit下, 而家雖然好似無左影, 但其實仲有好多鬼崇分店, 買黎做早餐係肥美而啱胃口. 其實食一個已經夠哂頂到Lunch, 但難得黎到唔食返兩個對唔住條脷. 揀左 #美式螺絲肉汁批 呢個麻麻地, 薯蓉似係粉開水嗰種無乜味, 批底係茄汁螺絲粉個汁又太甜, 佢個甜直頭係糖味重, 連蕃茄醬嘅酸味都無乜, 呢個咱一吸引係早餐可以食到焗意粉有啲新意, 但無下次. 呢到太多選擇, 第二個揀左勁耐, 最終貢獻左畀 #麻辣牛柳批. 本來覺得呢個配搭太奇怪, 但我又太鐘意食麻辣野所以怪都照去, 結果估佢唔到係好好味, 但佢好味並唔係因為個味夾, 反而係批皮同麻辣兩種味完全互不相干, 所以放埋一齊無問題. 批皮係少甜厚身曲奇, 能夠少甜因為本身佢就唔係為左整曲奇, 佢個少少甜帶住陣陣牛油香, 真係肥死但正到死, 我又鐘意食硬野, 厚身曲奇皮咬得爽. 至於麻辣牛柳啲牛純粹係畀返啲口感, 有野可以咬下, 用其他肉代替都得, 反正個味都會畀麻辣汁蓋過哂, 但絕對唔可以得汁會太漏. 麻辣個味有料到, 雖然對鐘意食辣嘅人黎講唔辣, 但麻辣香幾濃, 而且唔多食辣嘅人都未必頂到個辣, 以批黎講有呢個程度已經滿意. #批&撻

美式螺絲肉汁批size都唔細

有啲火腿同菇做饀, 但唔係好帶動到薯蓉個味.

螺絲粉有粟米粒咬下唔錯, 但敗在個汁太甜.

食完麻辣牛柳批, 想試埋佢南瓜批同叉燒批, 都係做呢個皮.

麻辣味好香

蛋撻唔關Pie&Tart事, 純粹想表達下一日裡面實在食左太多批&撻🙈