兩個人食左$1833, 唔係話食唔起, 但係畀得呢個價錢會有要求, 呢間野真係淨食裝修同打卡
服務無水準, 侍應無培訓, 餐牌設計失敗
食物重咸, 無一樣覺得出色, 只有普通同難食兩種程度
下面慢慢講

裝修幾靚, 尤其門口好有氣派, 一睇就感覺係高級地方
侍應帶我地穿過長長走廊先入到黎小人數用餐區
呢個位o既裝修畀我感覺係歐洲式又帶點香港懷舊感
但敗筆係樓底好低

叫野食開始頭痕, 因為佢有好多種套餐
最後我揀左個感覺性價比較高o既餐
個餐牌設計問題係令人以為無寫價錢, 佢有三道主菜選擇
如果主菜只揀一道或兩道或要三道個套餐就會唔同價
多餐揀唔係問題, 問題係我睇唔到價錢
其他餐牌都會最底清晰寫住幾錢, 咁我就問侍應幾錢 
啲侍應無受訓咁佢地有啲都知價錢 
望左我畀佢個餐牌一陣, 話搵另一個侍應過黎解答
然後面對住仲有四五個套餐比較, 我又唔記得左個價錢再問
都係問一個唔得又係話要搵另一個侍應黎答
好笑係後來發現餐牌最底有幾行極細字寫個價錢點計
你地自己侍應都唔知要搵人黎解答
期望客人會喺咁暗環境睇細節條款咁地毯式搜索價錢係邊嗎

其實個價錢同其他餐牌一樣清楚寫係下面咪好
神奇係啲有侍應自己都唔知寫左要再搵其他人問

餐具一開始畀左刀叉筷子杯就完
侍應無諗過你食啲野係唔係要隻碟墊下

先來前菜
荔枝汁漬荷蘭串茄+川小籠包+蟹膏蟹肉酥
食完呢個其實覺得幾好
所以對前面講o既野未有咁大反應
但因為除左呢個OK, 後來連續失望所以不吐不快
荷蘭串茄酸酸甜甜幾清新
小籠包多湯汁辣辣地惹味
蟹膏蟹肉酥最出色 熱辣辣勁酥脆 

揀呢間餐廳唔係因為有大量好評, 係因為有爵士湯
因為我好鐘意飲但無乜地方有
而且好多都要開一煲畀8人以上用
呢到可以一位計所以就過黎 結果勁失望
個味似龍蝦湯多過爵士湯
仲要重味到我都唔知係甜到極致反而太咸定點
然後舊疑似花膠物體真係無花無假好膠
成塊野都係整體同一口感, 唔會有啲位淋啲滑啲
真係覺得自己食梗一塊膠 
憑住對香港高級餐廳信心, 應該唔駛食元素表先敢吞

呢碟叫風沙紐西蘭羊架
Its English name is Breaded Rack of Lamb with Garlic
無論中英文名都理解唔到呢碟野係幾辣
個餐牌會唔會可以做得好啲, 畀啲指引人係辣野
本身譚仔食到中辣都覺得太辣
我唔係食唔到個辣度, 但係照顧下啲唔食得辣o既客人會唔小心叫左
同埋佢啲辣o既作用好絕係辟除羊味, 唔係令到啲羊更香口
根本主要係食辣多過羊味

上左呢碟菜侍應都係無意識畀隻碟我地
呢道菜咁多碎料都唔知佢地咩料
問侍應拎碟佢應左你但係唔做野
頂唔住再叫先慢吞吞拎畀你
當晚係星期四已經無乜客人
成班係到發夢
隔離枱已經嘈左好耐點解炒飯仲未上

XO醬露筍炒蟶子皇
無鑊氣 唔知係唔係擺盤都搞到凍左唔係好熱
蟶子一般貨色, 無話特別鮮甜
但超碼唔會太咸

見唔少人讚呢個流沙黃金銀雪魚 
全晚最失望係呢個, 咸到痴線
食第一件都要挖走塊皮先食到一舊魚
兩個人只係各自食到一舊
我諗讚o既人一定係食鹽多過我食米
失敬失敬

魚湯鮮菌浸菜苗
無特別 唔難食 唔過咸 唔鮮甜

蝦頭醬龍蝦粒炒絲苗
味道正常偏咸, 但佢個咸都算接受範圍內
當晚食唔落因為已經食左好多又咸又重口味野
反而打包拎返屋企蒸返食可以接受
但都係普通炒飯

蜜瓜甘露又係多人讚
好多人係咪今世未飲過維他蜜瓜豆奶? 
建議試一試會發現身邊有很多平價小確幸
呢碗野同維他蜜瓜豆奶一樣咁稀, 味道唔見得比維他好
裡面有為數唔多o既西米粒同柚子
如果將呢碗野改為做特飲會比較好受

總之呢間野就係擦靚個門面放啲有手有腳侍應
同砌靚啲食你唔壞o既野
好耐都無寫食評, 佢都算勁令我可以打返咁多字
完全口語, 因為想快, 希望呢篇幫到有緣人