真係好恨可以喪食日本野
我諗都有成兩個月無食過
所以買盒喪屍頂頂先!!!
好新鮮啊~~~$55.8一大盒
但係衰鬼得佢咁多件喪屍先俾得兩包豉油我
搞到我要就住用好唔過癮
最後仲因為無豉油放棄左四大條飯 =口=

買左包小食一同送服~~~~~
都係日本野

都係日本野
但係唔知點解呢樣野都係日本野 (傳說中o既裝假狗???)
呢樣就係以前細細個會食到賣五毛子一串o個d唔知叫乜鬼o既野 
激耐無食過 咁o岩今日俾我見到
但係印象中係泰國野黎架
不過呢個無一串串o個隻咁好食
下次都係食返原裝正版

最後當然唔少得my cup of tea
食完以上所有仲加多包疏打餅補返我無得食o個四條飯
一包疏打餅有四塊
剛好一命賠一命 呵呵

清晨五點幾 心情仍然低落
這個時間除了7仔都沒有地方可以安慰自己
近來開始又出現飲食失控跡像
週而復始之事

麻麻地呢

這是小弟晨早六點幾o既啤酒
我諗都無幾多人呢個時候先黎飲酒
呵呵

本來想買Mort Subite o既Framboise
還望有生之年儲到足夠o既啤酒蓋
但係send過email俾city super
佢地都話無賣 上網查過都唔多覺香港有

搵唔到Mort Subite反而俾我見到1664
都係近來所好之物 橙同桔我都唔會虧待 買左返屋企

但係支裝好似無咁正
不過可能只係個人狀態問題

已經第二晚因思想過度而失眠
酒入愁腸愁更愁?
唔會啦 能夠吃我所愛還是很感激的 : )

下酒物
會不會有點over?
自上次係飛機食過杯面之後都無再接觸此物了
哈哈

好耐無食小丑叔叔做o既早餐
失眠o既清晨諗起佢

升呢版=早晨全餐+熱香版
以前鐘意食早晨全餐因其炒蛋溜滑薯餅香脆
而家炒蛋已經唔滑lu
早晨全餐可以out掉
但係升呢版就可以保留因為可以同時食到甜同咸同埋比較飽肚
不過都係9唔9先會想食一次過下癮

想食Cheese Cake好耐
不過成日都見唔到最鐘意食o個款
見到又咁o岩唔係時候可以食cheese cake
今日終於忍無可忍 無最想食o個件都買左件
仲有今日突然鬼拍後尾枕醒左
原來自己一直將Italian Tomato同Strawberry Forever mix up左
明明自己係食Italian Tomato又以為自己食左Strawberry Forever
去到Strawberry Forever又以為佢係Italian Tomato.............
上網一查原來Strawberry Forever全港已經執淨一間cafe一間cake shop
話說當年佢係香港開業o個時我都有努力地食到VIP
但拎到VIP後直到VIP過期一次都無食過= =

食cheese cake從來都無乜罪惡感
只係怕芝士味唔夠濃
今日呢件口感唔錯 不過芝士味就唔夠濃
話說佢同我最鐘意o個件比 呢件其實仲平仲多料
食落去唔會輸得過o個件 可能仲嬴少少添
越來越發現自己迷上一樣野只係對過去所產生o既情意結
而質素會被情意結蓋過

即使有些人和事已不在了
留下來的卻是一個又一個的情意結
但是....也許....或者.....可能...........
不應該再執著下去了

地點為尖沙咀分店
兩人被安排坐於可容納四人的窗口位 環境不錯
光顧此餐廳原因如下
最主要為有六折優惠券
其次為從未試過這餐廳而引發出嘗試欲望
其次次為菜式合我心意

Nachos $118
極度失望的一道菜
Nachos的賣相是好很重要!!!! 
這道菜必須備有一上來就讓人食指大動的感觀刺激
然而這次一看到這個Nachos
未吃已知劣等............
賣相差
粟米片不夠脆
芝士味甚弱
肉醬少得視為欠奉 (現在想來都分不清那是肉醬還是豆, 還是兩者共存 = =)
其他醬料不好吃
話說沒有心去做這道菜就不要賣吧

Steamed Mussel $188
奶油味過濃 已經原全掩蓋青口的味道
青口肉質還可以 但很細小 
不過這也不算是餐廳的錯
外國做這種菜所選用的青口也大不了多少
然而人家給你不足1kg也給你800g的份量呢
這個價錢這個份量這個味道實在坑人
不過這道菜有另一好處
因為Nacho的醬不好吃
這道菜的汁用來配Nacho吃反而比較可口
可見其醬汁之濃............

Chicken & Broccoli Pasta $198
味道不夠咸 
西蘭花淋得媽媽都認不得
雞肉不好吃 它沒有雞味就算了 肉質也不太像雞 = = (外星食材?)
蒜蓉包過乾又沒什麼蒜蓉香
只有芝士及長通粉還可以

Double Chocolate Cake $98 (個蛋糕好似粒巨型黑加倫子 XD)
心太軟的替身
焗至微暖的海棉蛋榚中心注有朱古力漿
蛋糕質感差 最後連蛋糕也沒有吃完
雲呢拿雪糕為一般應有貨色
士多啤梨醬過酸

Mango Fruit Tea $56
芒果味喪弱的芒果茶 
但味道還好 
假如不跟我說這是芒果茶
其實我沒有不滿.............
但既然是芒果茶就該有芒果茶的自覺!!!

Corona $52
Bottle Beer 
None of Ruby Tuesday's Business

原價為$781 折後為$517.8
沒有優惠券的話實在太貴了
這價錢足以到酒店吃自助餐
還有這種質素 雖不到不能吃的地步
但不打到二五折 實在不值得吃
其實來吃前亦有上網先看食評
已知價錢略貴 質素好壞參半
然而本著有優惠券在手仍堅持著試
這次我中伏了...........T_T

死喇
好似又出現進入紅豆期o既跡象
繼上次飲唔到杯紅豆咖啡爆發左個紅豆期
近期好似出現復發o既跡象
可惜上次無做record
我都唔肯定自己食過咩"葯"
只可以而家係個腦到盡量回憶..............
紅豆沙 (中式) / 紅豆冰/ 紅豆糖/ 豆沙餅 (中式)/ 豆沙包 (叮噹式)/ 豆沙窩餅 (上海式)/ 豆沙湯丸/ 高力豆沙 (唔好食o既)/ 紅豆雪糕/ 紅豆批 (M記式)/ 豆沙夾餅 (日式)/ 紅豆雪糕糯米磁/ 紅豆飽 (麵包超人式)/ 豆沙煎堆 (中式)
話說我都挺佩服自己搵到咁多種.............
上次都已經食左咁多種
如果今次真係復發都唔知仲可以食咩止咳= =

這幾年來每隔一陣子都會去的cafe結業了
總覺得大魔王不斷一點一點地
把我僅有可以獲得安慰的人和物都弄消失
唉

唯有轉而求其次來這裡
本想重新物色新據點
然而明白現在是沒可能的
因為地點只是其次
我會去那個地方只是因為懷念過去某部份的自己
而過去那些部份還能出現在現在這個我身上嗎
還能以這些部份去創造什麼經歷嗎
真的看不出這個可能性有多高
越想就有種失去家園的感覺 哈

好耐無食o既egg tart
好靚仔 
but not a hot boy
poor you.............

因為見自己鐘意食榴槤雪糕
又會食下榴槤糖
所以就想測試下自己食唔食得榴槤
其實細個都食過 
我記得o個次好似係某親戚買上黎屋企一齊食
我仍然記得老豆食左好少就即刻衝入厠所o既身影................
但係就已經唔記得左榴槤係咩味 
(可能老豆衝入厠所o既衝擊太大cover左我對榴槤o既記憶 hahah)
因為屋企個個都唔食榴槤 
所以多年以來都無再食過

食落去都接受到 但又唔覺得好好味
唔太鐘意佢外面好似有層食落質感爽爽地o既外皮
我只係想食佢裡面好似pat屎咁o既質感 hahaha
仲有唔知係唔係我切開左無一次過食哂
第二日食埋淨低o個邊好似變壞左有怪味
還是榴槤本身就係咁?
anyway 都係食返榴槤雪糕
正好多~~~~~~~~~~~

維記o既豬潤麵大名已經聽左太多年
但因為從來都唔多願意排長龍食野
所以一直都未試過
咁o岩去黃金砌機要等九個字先有機拎
所以就過黎睇下多唔多人
我諗唔少人都係因為去黃金然後順道過黎食返碗
我又好好彩唔駛等就有位
唔駛諗就叫左佢兩個招牌菜
潤牛米+咖央西多士

潤牛米 $25
賣相真係毫無賣相可言
不過從來都唔多怕食核突野o既我
並無影響心情
其實本身唔多好豬潤 但又唔會話唔願意食
佢呢到堅係有佢功架o既
整得比平時o既好食
D豬潤嫩滑好多 同埋無咁大陣苦味
個湯底好有豬潤味 清清地係唔錯
但係牛肉真係好唔得
應該用左好多生粉乸佢
但都仲要食落有渣............
我見好多人都叫豬潤配其他野
睇黎大家都知道牛係麻麻地
味道未至於驚為天人
亦都唔會一輪唔食囉囉攣 可能因為我唔係豬潤愛好者
唔駛排隊順路過黎食個豬潤米都OK

再黎咖央西多士 $13
呢個真係好食 不過衰在唔夠熱 
佢kaya做得清清甜甜 蛋漿上得唔錯 好味~~~
都係未至於驚為天人
不過香港真係唔多地方有kaya食
呢個一輪唔食都會記住佢 : )

食完豬潤米同kaya西多
飲住維他檸降溫
真係好飽飽~~~~~~~~~~

因為維記地方淺窄人多 其實個個都係食得口急急
食完都未夠九個字 就走去行下
同一件事發生 就係走去行下又走左去買野食 = =
其實以前經過坤記都見佢人頭湧湧
所以我估佢應該都出名掛
不過我唔好甜o既糕點 (除左雪糕)
所以從來無買過黎食

但係記得娘親會食白糖糕所以就打去問下佢食唔食
佢話試下都好
所以就買左白糖糕 砵仔糕 紅豆糕
我問過阿姐砵仔糕同紅豆糕有咩唔同
佢好理直氣壯咁答我: 係好唔同o既..................

佢個袋

白糖糕$5件
拎出黎兩老已經話"嘩 咁鬼貴"
唔係話$5好貴 而係真係太過細舊
我試左少少覺得好難食
因為我從來都唔鐘意食
佢地就話唔算差 
不過都係有少少白糖糕好難去o既酸味
睇黎以後唔駛再買 又貴又麻麻地

紅豆糕 $7 都係細細件 
呢件中規中矩 唔會想black list佢
不過都係唔會返單架喇 

砵仔糕$5個其實係偏貴
呢個無特別細件
因為都係用平時見開o個種碗整
味道就堅係麻麻地 
件糕唔覺香甜 紅豆不見出色

總結: 坤記永別了

食完潤牛米+kaya西多+坤記糕點
一粒鐘後就食晚飯
有白灼蝦蒸黃花魚腐乳通菜
真係飽到我hihi
飯後仲係到掃花生
睇黎已經食到失左控...........................

係網上見到上面呢張圖所以吸引左我落樓下Dablo
落樓下除左錢連電話都無帶所以相都無張
首先買之前要自己劃紙揀想食咩
乜都想試o既我當然係豬牛各四安士
揀左沙嗲湯底 盛惠五十二個大洋
但係竟然唔連野飲
睇返個promotion講到食夠百二蚊送一公升汽水
我仲以為係另外送一支樽裝俾你拎返屋企
唔包野飲都算 但佢最cheap係個定價
佢最貴個半磅肥牛窩先賣$55
即係你兩個人都願意食呢個窩都送唔到野飲
仲要自己再額外加餸先有百二蚊
我見有D人食夠百二蚊送左汽水
但佢所謂o既一公升汽水裡面有三分二都係冰
送得你咁cheap就唔好送la
Dablo無野飲好唔掂喎
最後自己叫左個紅豆冰
超唔得 椰汁激少 
只係見到豆還豆 水還水
其實之前試過一次都覺得難飲
但諗住可能一時唔好彩 
經過今次真係要black list佢個紅豆冰!!!

講返個火鍋 
沙嗲湯底裡面有件豆腐仲有少少菜
豬牛各四安士 (真係幾多下)
仲有菜 (正常份量) 金菇(超少)
魚蛋魚片 (各兩件) 炸魚皮 (兩塊)
金邊粉 (一蝶)
沙嗲湯底唔會唔好味 不過無乜沙嗲味
唔當佢沙嗲湯的話唔會有乜大問題 哈
豬牛多到我要硬食 新鮮度同質素以及份量黎講
呢個價錢都算合格有餘
菜/金菇/魚蛋魚片無特別地合格了
炸魚皮好好食 好脆好fresh 好味過平時酒樓Dablo o個D添
金邊粉都幾好 好少Dablo有金邊粉揀 I like it :)
仲有佢做到酒樓咁 有哂椒絲/生蒜/炸蒜/蔥任添
呢個係值得一讚o既
仲有佢個火都可以去到幾大下 D野好快就熟
唔會要喪等先有得食

總括黎講$52一個豬牛鍋
呢個價錢呢個質素呢個份量其實係值o既
不過無野飲就真係唔掂
仲要cheap到咁樣定價去送汽水
係情緒上黎講我唔多唔少會因為你咁cheap而想抵制你

不過食完真係飽到好辛苦
仲要飲哂個紅豆冰 (唔想浪費食物)
其實四安士都夠一個人食................... 

食完飯太飽想行下 行下又走鬼左去買野食 (惡性循環 = =)
八點da完blo 十點幾見到D零食又忍唔到口
明明都仲飽到就黎爆炸
而基於我係一個完整主義者
從來就無開左食少少過口癮呢個觀念
一食就食哂....................

係火星o既時候差唔多日日都食waffle
除左係街上面食到新鮮熱整o既waffle外
仲有呢種係超市又或者朱古力店買到o既waffle
佢個質感都幾過癮
無一般waffle咁軟熟 但又未到餅乾咁dry
中間夾左層甜到hihi o既醬 (先唔好計有幾多kcal)
所以通常係會搭住咖啡或茶黎食
而我娘食一啖就棄權
帶返黎呢隻應該係vanilla味
佢其實仲有其他唔同味 
雖然我平時都唔算好甜
但可能俾佢地同化左
所以都食左唔少..............

返到黎仍然繼續日日食
食到今日已經係最後一塊 Cry........
唯有同佢拍返張遺照
暫時別了 My Dearest Waffle

想食牛但又想試其他新野之際
發現有個牌寫住有廿蚊餐
窮鬼心態下二話不說就叫左呢個餐

個包份量都OK 不過味道都係老麥魚柳飽跑嬴少少
呢到炸到太dry喇 又少沙律醬
不過個薯格好正~~~
熱辣辣 超厚身 但仍然帶有juicy感 Yummy~~~~
食完喉嚨即刻有feel
證明炸得夠勁
注: 身體虛弱者不宜進食

一至五都有一款廿蚊餐
好似係2pm後先開始
平時食都要aorund五十蚊一個餐
個promotion做到月尾咋
想食就快d去喇
佢個牛真係幾好食架 Yummy~~~~

p.s 呢日財運享通 唔好俾佢停!!!!!!!!!!!!

花園街尾新開的餐廳
配合著旁邊西式的小攤販
整個餐廳帶有外國情懷
然而最吸引我並不是它的風格
而是門前1664啤酒的標誌
這啤酒上次在機場餐廳一試難忘
去過幾家酒吧都不見有賣
前陣子逛街經過這餐廳發現有賣就決心一試
然而到訪當日因為餐廳仍未取得酒牌而不賣酒
有點失望
更失望是咖啡也只有最普通的且味道不好
這餐廳明擺著露天茶座及酒吧的門面
然而竟未能提供像樣的酒及咖啡
但願這只是因為新開張不久未能盡善
日後能改進

然而這裡的食物水準讓我有所驚喜
雖然賣的仍是西餐
然而菜式比一般西餐廳來得特別
來的時候還未到晚餐時間就先點了雞翼作小吃 味道不錯
印象中是拍了照卻不知為何找不回來

紅白湯各要了一個 水平不算特別高但仍討好
頭盤之一是黑魚子鮮蝦忌廉蛋
雞蛋內裡是半生熟再釀入小蝦
面頭貌似魚子的東西頗咸 剛好為雞蛋調味
做功看來花了點心機

頭盤二
蕃茄從底部挖空再釀入沙律般的餡料
但不太記得裡面用的是什麼材料
只試了一口 印象模糊

酥皮豬配烤蘋果
豬扒以酥皮包裹 
味道很好 第一次吃這種菜式
烤蘋果其實也做得不錯
但不太對我胃口

意大利飯配鴨肉
鴨肉跟平時吃到的不太一樣
這裡的口感更好 更有肉汁
然而意大利飯做得很差
完全沒了應有的綿韌

整體來說這間餐廳做的菜是不錯
雖然意大利飯有所失手
但其他菜式頗特別且味道不錯
若飲料部份日後也上軌道將會是間不錯的餐廳
這頓飯平均二百多一人
一杯飲品 一些小吃 一個湯 一個頭盤 一個主菜 
是否值得見仁見智 而我一定會再來試吃

飯後去了Haagen Dazs吃甜品
原本想吃的那個賣完了
只好選這個 可挑五款雪糕

兩層高分開來變成這樣
雪糕溶得超快
雪糕中間夾著的是彷如超甜版光酥餅 好難吃
其實朗豪坊這間Haagen Dazs 味道好像是特別差
以後如非有其他原因都不會去了

朋友介紹的燒烤場地點位於西貢
平日與假日價錢略有不同 最貴為$148 (包一罐汽水及一支水)
相比一般燒烤場貴 但我覺得還算物有所值

位置靠海 場內環境比我去過的百元以下燒烤場寬敞整齊乾淨
洗手間環境別奢望有酒店級享受 但至少乾淨不臭就不錯了
我去的時候還見阿姐在拖地

食物總類該有的還是會有 
雞翼 牛扒 豬扒 金沙骨 鴨胸 煙肉 雞腎 
咖哩尤魚 多春魚 秋刀魚 
牛丸 墨魚丸 龍蝦丸 魚蛋 香腸 紅腸 芝士腸 獅子狗
青椒 茄子 番薯 粟米 麵包(多士/法包)
(暫時想到的只有這些)

有些不該有的卻仍然有
比如有自助熟食 種類也有八到十款吧
這是平時較少見的 等不及燒出來的可以先來些熟食填肚
比較欣賞有蝦片 炸出來的那種 蠻香脆
茶葉蛋 離開時還運走了兩隻
凍菠蘿 解渴之選

因為要留肚 所以沒多試熟食
朋友說質素OK

肉類質素不見得突出 但是新鮮程度可以

香腸比一般燒烤場好 但是丸類完全碰不得
七成用粉做的 不管吃什麼丸味道都是一樣
都是不好吃

其實除了丸類不合格 其他都達六至七十分
這裡另一好處是比以前去過的燒烤場提供更多任添用具
比如炭/ 刀叉筷子/ 膠手套/ 蜜糖/ 蒜蓉牛油/
還有獨立包裝的芥辣/ 鼓油/ 茄汁/ 辣椒油任君提取 

其實$148這個價錢主要買的還是環境 
近海 寬敞乾淨整齊 設備齊全 食物用具添加速度好
交通方便 24小時小巴來往旺角 不用趕時間
在這裡燒烤感覺很休閒 可以慢慢燒 慢慢吃
現場也有不少二人BBQ世界
這個場的出現讓我認為BBQ可變成唱K般方便的活動
呵呵

吃飽後去了附近的Bar 外面有藍色燈泡作裝飾
高度提議不要去這間Bar
作為酒吧 酒類選擇太少 
試過紅豆冰及cocktail 味道很差
現場註唱的音量又太大
本來對著海是它的賣點之一
它卻布置了N盤桔把海景遮蔽...........無語....

Happy Birthday to YOU :)

朋友出難題 早餐Tea Dinner都唔食
偏偏揀左食Lunch
本人毫無食Lunch經驗
平時返工就同公司食
唔駛返工就訓到唔食
R爆左頭後揀左以下呢間

帆立貝墨魚汁意粉 


精緻Set


滑溜溜炒蛋特寫

我鐘意食o既爛飯
好味道 不過如果D飯再爛D就更正喇


朋友o既Ice Mocha Latte


我o既Cappuchino
整得靚 夠滑
咖啡味偏淡
整體黎講都唔錯

呢間餐廳特別之處係
佢係一間Boutique
前面係餐廳後面賣衫
雖然得個開放式Bar當廚房
但係又整到野食同野飲而且都唔錯
價錢合理 環境舒適
呢間餐廳最適合我星期六放工黎Tea一Tea
飲杯Coffee過一過D頹氣

朋友閃人之後又唔想返屋企
自己去左尖沙咀海旁散步
近幾日真係好大霧 
眼前一片矇矓


然後自己一個係Starbucks發酵左兩粒鐘
係咁不停諗野 諗到好攰
六點天黑越黎越凍就返左屋企lu

聖誕重頭戲 德國菜
個幾星期前就Book定位
一直心郁郁想食德國菜

先黎幾款啤酒 
左係Weisbier Hefe
右係Warsteiner

右係Weisbier Dunkles
仲有叫左支Stella
最好飲係Weisbier Dunkles
Warsteiner都唔差
當晚加埋先飲左3L 唔係好多

先黎左幾件麵包 麻麻地
被我係咁二蹂躪左幾下

頭盤係炸磨菇 都唔錯
裡面幾Juicy 不過得六粒
唔夠喉

某人對腸情有獨鐘 我很貼心地order盤大腸滿足佢o既"口慾"
其實呢d係乜腸我真係無研究 但愛腸人士話佢條條都食過
條條都知佢叫乜名  果然平時含唔少 哈哈
呢到有mustard同honey mustard任用
我好鬼鐘意食honey mustard
用黎點野食一流 不過我搞到似係為左食醬多過食餸
無計 鬼叫隻醬咁正~~

薯條一盤 唔記得係跟邊道菜一齊
質量一般 但勝在一邊吹水一邊過下口癮
仲有好處係用呢個可以點爆個honey mustard 哈哈

Raclette Cheese一上枱
我已經即刻提醒大家呢味野要趁熱食
然後大家過份合作到好似搶食咁............
芝士加埋酸瓜一齊則落口個口感真係好正
呢到酸瓜好好味 唔會太酸又爽口又厚身
第一次食咁o既酸瓜 不過配薯仔都唔差
洋蔥我也愛
本人覺得芝士臭到呢個程度就夠
但座上有兩人認為完全食唔到臭味
再臭D都仲得 正一臭味相投

其實仲有個主菜豬手
但係我竟然掛住飲飲食食同吹水唔記得同佢影相
嗚嗚~~~
呢到豬手失色左D 味道唔差但個皮唔夠脆 
因為豬手係最後上 大家後勁不計食剩左D

整體黎講呢間野可以keep住食
之前食開o個間德國野個場大呢到好多
又有live band 好熱鬧
而呢到就得個細酒bar同6張枱
如果想靜靜地食 呢到其實係好好多
平安夜呢到都好安靜 唔迫人
最嘈已經係我地 哈哈
呢間野串到聖誕o個日都唔開 
但係serve你o既人係好nice o既
啤酒黎講就兩間都好
不過呢到就無得飲o個支貌似我咁高o既啤酒柱
麵包就我食開o個間好太多喇
豬手都係o個間正得多 個皮夠哂脆
印象中o個邊好似唔多覺有Raclette Cheese食
其實兩間都各有各好 價錢都唔係相差好遠
今餐埋單都係一千多少少 正常價錢

第二ROUND去左參觀新屋同打機打麻雀
打機同打麻雀都係我o既弱項
打機都還可以 因為我覺得好玩
輸又輸得好好笑
但係麻雀我就真係陪襯only 我都唔鐘意打麻雀
當係上繳娘親

開左一支2000年紅酒
問親個個都話開無所謂
開左個個都唔係咁想飲
頂 嘥鬼哂 覺得有D肉赤

玩到天光先返屋企
本來第二日都有PARTY然後落BAR
過目過和牛又阿拉斯加長腳蟹仲有威爾斯羊都引我不成
老喇真係有心無力 第二日又約左人食Lunch
唯有忍痛投降
我期待快D有下次 大家再出黎大魚大肉
難得個個都咁吹得咁識講笑
久唔久癲下係好事

後補冬至Lunch at Pizza Hut
大和風味芝心批一上枱 熱辣辣
眼前一亮 個賣相真係幾吸引
其實品質ok 不過味道就唔多夾我
我始終都係超級至尊粉絲
另外仲叫左粟米肉醬薯蓉/Carbonara意粉/葡汁雞皇焗飯
我就飲左杯coffee 一向都覺得Pizza Hut o既coffee係唔錯
最後食剩三件Pizza打包
呢餐係公式化o既一餐 Pizza隻味唔夾我就等同某D人唔夾我一樣
呢餐純碎借節日名義開刀

唔知點解 次次見Yumi姐都係食呢間
不過Gelare係澳洲係我o既恩物
係香港再食雖然感覺無係澳洲咁好食 (可能係情意結問題)
不過我仍然捧場
上次食個細waffle唔夠喉
今次食個大 都係相差好似五個大洋咁大把
一向作風走cream留syrup
Waffle大個左 不過覺得無上次咁好食
最後仲食唔哂

雪糕係Jamaican chocolate同Blueberry cheesecake
Blueberry cheesecake又係我係澳洲必點
o個時Gelare未係香港開我仲擔心以後無得食
但係而家香港開左我又覺得佢整得唔夠澳洲好食
不過佢個Jamaican chocolate反而令我有驚喜
裡面有D朱古力碎 幾脆口 朱古力味又夠
另外推介佢隻Macadamia Nut 
真係唔錯唔錯  過多排一定又要再去回味
不過希望唔係同Yumi姐 轉下人都好掛 哈哈

一向對節日不熱衷的我
也藉著聖誕節的名義努力清還飯局債務
並順道和朋友們一聚

Round 1~泰國菜
呢間餐廳唔係第一次食
多年前水生半夜三間車過我去食
當時對佢印象麻麻 因為味精重及油多
今次朋友再度推介 因此故地"重油"
兩個人點左四樣野加多杯青檸梳打

呢個蝦餅唔錯 即炸即上 夠香口
唯兩人八件難以將它完全消化

第一次食咖哩蜆
咖哩蟹聽得多亦食過幾次
咖哩蝦亦有聽及見聞過
唯獨咖哩蜆於我來說是新奇之物
但環觀餐廳內食客 近乎每枱只有咖哩蜆
而沒有咖哩蟹/蝦/海星/水母/海草...............

啲蜆真係好Q大隻 佔左隻碟一大半

我都係第一次食咁大隻蜆
不過其實味道就一般
個咖哩汁太甜 味道好重
D蜆其實上唔到咖哩味
不過呢個係正常
一向蜆聖子之類o既海產都係難上味
拎佢清酒慢煮都仲有得救下

薄餅一碟真係估佢唔到係咁多
不過油到爆 完全唔似食naan
點個汁一齊食中和下都可以食到好多塊
唔expect佢係naan咁食 其實都OK

之後仲叫左個串燒豬牛羊共六串
無影到相
肉係一貫串燒品質
個汁對我黎講就太咸
食剩一串 好飽lu~~~~~~~

朋友叫左杯青檸梳打
對我黎講太甜 但朋友好接受
本來食啲咁重味o既野想叫支啤酒降下火
但係得我一個飲所以打算叫細支裝
點知細支裝未雪就無叫
但真係好鬼死口渴
食完呢餐我係口渴到第二日= =
其實呢間野又未到唔好食
但咁多年黎佢都仲係保持重味精同油o既風格
不過朋友好鐘意食呢間野
而我自己永遠都唔會提議再去食呢間
但你鐘意食 我下次仍然可以捨命陪君子
見係你咋 呵呵

p.s. 當晚仲見到2R其中一R (假如無認錯), 同埋吳建豪一齊黎食飯